Annamayya Keerthana || చూడరమ్మ సతులారా - cUDaramma satulArA

ప|| 

చూడరమ్మ సతులాల సోబాన పాడరమ్మ |

కూడున్నది పతి చూడికుడుత నాంచారి ||

 

చ|| 

శ్రీమహాలక్ష్మియట సింగారాలకేమరుదు |

కాముని తల్లియట చక్కదనాలకేమరుదు |

సోముని తోబుట్టువట సొంపుకళలకేమరుదు |

కోమలాంగి ఈ చూడికుడుత నాంచారి ||

 

చ|| 

కలశాబ్ధి కూతురట గంభీరాలకేమరుదు |

తలపలోక మాతయట దయ మరియేమరుదు |

జలజనివాసినియట చల్లదనమేమరుదు |

కొలదిమీర ఈ చూడికుడుత నాంచారి ||

 

చ|| 

అమరవందితయట అట్టే మహిమయేమరుదు |

అమృతము చుట్టమట ఆనందాలకేమరుదు |

తమితో శ్రీవేంకటేశు తానె వచ్చి పెండ్లాడె |

కొమెర వయస్సు ఈ చూడికుడుత నాంచారి ||