Annamayya Keerthana || కట్టెదుర వైకుంఠము - Kattedura Vaikuntamu lyrics in telugu

కట్టెదుర వైకుంఠము కాణాచయిన కొండ

తెట్టలాయ మహిమలే తిరుమల కొండ

 

వేదములే శిలలై వెలసినది కొండ

యేదెస బుణ్యరాసులే యేరులైనది కొండ

గాదిలి బ్రహ్మాది లోకముల కొనలు కొండ

శ్రీదేవు డుండేటి శేషాద్రి కొండ

 

సర్వదేవతలు మృగజాతులై చరించే కొండ

నిర్వహించి జలధులే నిట్టచరులైన కొండ

వుర్వి దపసులే తరువులై నిలచిన కొండ

పూర్వ టంజనాద్రి యీ పొడవాటి కొండ

 

వరములు కొటారుగా వక్కాణించి పెంచే కొండ

పరగు లక్ష్మీకాంతు సోబనపు గొండ

కురిసి సంపదలెల్ల గుహల నిండిన కొండ

విరివైన దదివో శ్రీ వేంకటపు గొండ